|
Amerika Dövlət Katibinin köməkçisi Azərbaycanda demokratiya və insan haqlarını müzakirə edib
|
18/11/2008
|
|
ABŞ Dövlət
Katibinin Demokratiya, İnsan Haqları və Əmək Məsələləri üzrə Köməkçisi Devid Kramer
Bakıda səfərdədir. ABŞ-ın Azərbaycandakı səfirliyinin məlumatına görə, o cəm
şəkildə insan haqlarına aid olan məsələlər: mətbuat azadlığı, din azadlığı və
sərbəst toplaşma azadlığı da daxil olmaqla müzakirələr aparacaq. “Azərbaycanda
demokratik islahatlara dəstək ABŞ-ın siyasi prioritetidir. Cənab Kramerin
səfəri də başlanğıcı prezident Əliyev və ABŞ tərəfindən qoyulmuş dialoqun
davamıdır”.
Bu gün cənab Kramer prezident İlham Əliyevlə, müxalifət partiyalarının və
iqtidar partiyasının rəhbərləri, prezident seçkilərində namizəd olmuş
liderlərlə, vətəndaş cəmiyyətinin təmsilçiləri, media rəhbərləri ilə görüşüb.
AzərTac Dövlət Agentliyinin məlumatına görə, prezidentlə
görüşdə Azərbaycanla ABŞ arasında ikitərəfli münasibətlərin bütün sahələrdə
uğurla inkişaf etdiyi bildirilib, qarşılıqlı maraq doğuran bir sıra məsələlər
ətrafında fikir mübadiləsi aparılıb.
Müxalifətdə
olan AXCP sədrinin müavini Fuad Mustafayev bildirib ki, siyasi partiya
rəhbərləri və prezidentliyə namizədlərlə iki saat davam edən görüşdə insan
haqları, demokratiya, söz və mətbuat azadlığı, həbsdə olan jurnalistlər, siyasi
partiyaların mövcud durumu, partiya quruculuğu məsələləri müzakirə edilib. Onun
sözlərinə görə, görüşdə iqtidar partiyası ilə müxalifət arasında fikir ayrılığı
yaranıb.
İqtidarda olan
“Yeni Azərbaycan” partiyasının icra katibinin müavini Mübariz Qurbanlının
dediyinə görə, enerji, enerji təhlükəsizliyi, regional təhlükəsizlik məsələlərində
bütün tərəflərin mövqeyi eyni olub. Ancaq insan haqları sahəsində müxalifətin mövqeyi
polemikaya səbəb olub.
Dövlət
katibinin köməkçisinin vətəndaş cəmiyyətinin təmsilçiləri ilə görüşünün əsas
mövzusu isə hökumətin idarə edilməsində vətəndaş cəmiyyətinin rolu və insan
haqları məsələləri olub.
Hüquq
müdafiəçisi Səidə Qocamanlının dediyinə görə, ölkədə insan haqlarının
acınacaqlı durumu, mediaya təzyiqlərin davam etməsi, siyasi məhbus problemi,
həbsdə olan jurnalistlərin azadlığa buraxılmasının zəruriliyi cənab Kramerin
diqqətinə çatdırılıb.
Xanım Qocamanlı
xarici radiostansiyaların yayımının yerli tezliklərdə dayandırılması ilə bağlı
məsələnin də diqqət mərkəzində olduğunu deyib. Onun fikrincə, bu radioların
yayımının dayandırılması mətbuata təzyiqlərin davamı kimi
qiymətləndirilməlidir.
Politoloq Rasim
Musabəyov hesab edir ki, ABŞ ölkədə vətəndaş cəmiyyətinin inkişafına kömək
etməlidir. Onun sözlərinə görə, demokratik azadlıqlar sahəsində hələ də ciddi
problemlər qalmaqdadır.
|
E-mail
Çap et
