واشنگٹن ڈی سی میں چیری بلاسم

1912 میں جاپان کی جانب سے دوستی کے جذبے کے تحت چیری کے تین ہزار تین سو بیس درخت امریکہ کو تحفے کے طور دیئے گئے تھے۔ جو اب امریکی دارلحکومت واشنگٹن ڈی سی کی رونق بنے ہوئے ہیں اور ہر سال نہ صرف امریکہ سے، بلکہ دنیا بھر سے سیاح موسم بہار کے آغاز میں دوہفتے جاری رہنے والے چیری کے میلے میں شرکت کے لئے آتے ہیں۔ اس فیسٹول کا آغاز 1935 میں ہوا تھا۔

دو ہفتے جاری رہنے والے اس فیسٹول میں دیگر کلچرل تقریبات اور تفریحات کا بھی اہتمام کیا جاتا ہے۔ چیری بلوسمز پریڈ خاص طور پر بہت مقبول ہے جسے دیکھنے کے لیے لوگ دور دور سے آتے ہیں۔ یہ پریڈ رنگ برنگے غباروں، سجے ہوئے فلوٹز، قدیمی گاڑیوں، گھوڑوں، ملٹری اور مختلف نمایاں شخصیات کی جانب سے دی جانے والی پرفامنس پر مشتمل ہوتی ہے۔

گیارہ ستمبر کے واقعات کے بعد جہاں امریکہ بھر میں سیاحوں کے آنے میں کمی آئی ہے وہیں اس سے واشنگٹن کا یہ فیسٹول بھی متاثر ہوا ہے۔ لیکن ایک اندازے کے مطابق اس سال دس لاکھ کے قریب لوگ چیری بلوسمز کے دلکش رنگ سے لطف اندوز ہونے امریکی دارلحکومت آئے۔