پچھلے دنوں امریکی دارلحکومت واشنگٹن ڈی سی میں پاکستانی سفارت خانے نے ایک اوپن ہاؤس کا اہتمام کیا ہے۔ یہ اوپن ہاؤس سیا حت کے فروغ کے لیے کام کرنے والے کلچرل ڈی سی کے پاسپورٹ نامی پروگرام کے تحت منعقد ہوا۔

اس اوپن ہاؤس میں پاکستان کی تہذیب و ثقافت کو اجاگر کرنے کا بطور خاص اہتمام کیا گیا تھا۔ اس میں جہاں خوش ذائقہ پاکستانی پکوان اپنی خوشبو بکھیر رہے تھے وہاں پاکستان کے روائتی ملبوسات ، زیورات اور دستکاریوں کی نمائش بھی کی گئی تھی۔ اس موقع پر ایک فیشن شو بھی کیا گیا۔

اوپن ہاؤس کا ایک خاص پہلو پاکستانی فن کاروں کے فن کا مظاہرہ تھا جس میں پاکستان کے معروف گلوکار ابرار الحق اور ایک ابھرتی ہوئی فن کارہ عینی نے اپنی پرفارمنس سے حاضرین کے دل موہ لیے۔ اس خصوصی تقریب میں بڑی تعداد میں پاکستانیوں اور امریکیوں نے شرکت کی۔

یہ اوپن ہاؤس اس لحاظ سے بھی بہت اہم تھا کہ اس کے ذریعے پاکستان کا ایک مثبت اور روشن پہلو دنیا کے سامنے پیش کیا گیا۔