اسکول کے ملبے سے ایک گیارہ سالہ طالبہ کو نکال کر اسے فوری طبّی امداد دی جا رہی ہے

سی چوان صوبے میں ایک عورت کو زلزلے کے آٹھ دن کے بعد ملبے سے نیچے سے زندہ نکال لیا گیا۔ چین میں آنے والے زلزلے سے ہزاروں عمارتیں زمین بوس ہو گئیں اور پچاس لاکھ  سے زیادہ افراد بے گھر ہوگئے، جبکہ ہلاک ہونے والوں کی تعداد 40 ہزار سے تجاوز کر گئی ہے۔

سرکاری خبر رساں ایجنسی زنہوا نے اطلاع دی ہے کہ اس خاتون نے195 گھنٹے ملبے کے نیچے گذارے، اس کے بارے میں مزید تفصیل معلوم نہیں ہو سکی۔ زندہ بچ جانے والوں میں یہ دوسری فرد ہیں۔ اب ملبے میں دبے ہوئے افراد کے زندہ بچ جانے امیدیں دم توڑتی جا رہی ہیں۔

چینی عہدہ داروں کا کہنا ہے کہ ہلاک ہونے والوں کی تعداد 40 ہزار سے تجاوز کر گئی ہے اور ممکن ہے کہ یہ 50 ہزار تک پہنچ جائے۔

اس وقت چینی حکام کی زیادہ کوشش یہ ہے کہ زندہ بچ جانے والوں کی بہتر دیکھ بھال کی جائے۔ان کے لیے تیس لاکھ خیمے درکار ہیں۔ اب تک  دو لاکھ80 ہزار خیمے سیچوان پہنچ گئے ہیں اور بقیہ کے لیے چینی کارخانے دن رات کام کر رہے ہیں۔