سینیٹر ہلری کلنٹن پورٹوریکو میں

پورٹوریکو میں ایک بڑی سبقت حاصل کرنے کے بعد سینیٹر ہلری کلنٹن نے ایک بار پھر اس عزم کا اظہار کیا ہے کہ وہ مقابلے سے دست بردار نہیں ہوں گی اور یہ کہ ان کا سیاسی سفر ختم نہیں ہوا ہے۔ سابق امریکی خاتون اوّل نے پورٹوریکو میں دوتہائی اکثریت حاصل کی تھی۔

 ہلری کلنٹن کااپنے ووٹروں سے کہناتھا کہ آپ نے جس پرجوش طریقے سے میری حمایت کا اعلان کیا ہے اس کے لیے میں آپ کی بہت شکرگذار ہوں۔ میں پورٹوریکو میں آپ کی آواز سننے کے لیے آئی ہوں کیونکہ آپ کی آواز سنی جانی چاہیے۔ آپ میری نظر میں رہیں گے اور میں ہمیشہ آپ کے لیے آواز اٹھاتی رہوں گی۔

گو کہ فلوریڈا اور مشی گن کے ڈیلی گیٹس کا مسئلہ حل ہوا ہے مگر ہلری کی توقعات کے مطابق نہیں۔ ان ریاستوں کے ڈیلی گیٹس کے نصف ووٹ شمار کرنے کا فیصلہ کیا گیا ہے جو ہلری کی کامیابی کے لیے کافی نہیں ہیں۔

براک اوباما متوقع طور پر ساؤتھ ڈیکوٹا اور مون ٹینا کے پرائمریز کے بعد نامزدگی حاصل کرنے کے لیے درکار ڈیلی گیٹس حاصل کرنے میں کامیاب ہوجائیں گے۔ اس مرحلے پر وہ ہلری کلنٹن کو ایک اچھی سیاسی کارکن قرار دے رہے ہیں اور اس توقع کا اظہار کررہے ہیں کہ ڈیموکریٹک پارٹی نامزدگی کے بعد اکھٹی ہوجائے گی۔

مگر ہلری کلنٹن کا کہنا ہے کہ وہ جان مکین کو شکست دے سکتی ہیں اور چاہے ڈیموکریٹس کی زیادہ تعداد براک اوباما کی حامی ہی کیوں نہ ہو پالولر ووٹ میں وہ براک اوباما سے کہیں آگے ہیں۔