سینیٹر براک اوباما اور انکی اہلیہ میشل اوباما

سینیٹر براک اوباما 1961 میں ہوائی میں پیدا ہوئے۔ ان کے والد کا تعلق کینیا سے تھا اور والدہ امریکی ریاست کنساس کی رہنے والی تھیں۔

انہوں نے اپنے بچپن کا کچھ حصہ انڈونیشیا میں گذارا۔ انہوں نے کولمبیا یونیورسٹی اور ہاروڈ لاء کالج سے تعلیم حاصل کی۔

ان کی بہن مایا سوٹورو کا کہناہے کہ اوباما زندگی کے جن تجربات سے گذرے ہیں اس کی بنا پر وہ امریکہ کے صدارتی انتخابات کے لیے ایک بہترین امیدوار ہیں۔

اوباما نے اپنی سیاسی زندگی کا آغاز الی نوائے کے سٹیٹ سینیٹر کی حیثیت سے شکاگو کے کم آمدنی والے مضافات میں خدمات سرانجام دینے سے کیا۔ اس تجربے نے ان کے سیاسی سفر پر گہرے اثرات مرتب کیے۔

 2004 میں براک اوباما سینٹ کے لیے منتخب ہوئے اور یہی وہ سال تھا جب انہوں نے ڈیموکریٹک نیشنل کنونشن میں تاریخی تقریر کی۔ انہوں نے کہا کہ میں آج یہاں کھڑا ہوں ، اس احساس کے ساتھ کہ میری کہانی دراصل امریکہ کی کہانی ہے۔ دنیا کے کسی اور خطے میں میری کہانی ممکن ہی نہیں تھی۔

ایک تجزیہ کار فرینک موکیویز کہتے ہیں کہ ان کے ارادےعظیم ہیں اور اگر کسی نے ان کی کتابیں پڑھی ہوں، خاص طورپر ان کی پہلی کتاب تواسے یہ معلوم ہوگا کہ وہ گہرے جذبات اور بلند سوچ رکھنے والے شخص ہیں۔ وہ نعروں کی سیاست نہیں کرتے۔ اس لیے میں سمجھتا ہوں کہ کامیابی ان کے قدم چومے گی۔