براک اوباما کا سیاہ فام والدین کے نام پیغام

امریکی صدارتی امیدوار براک اوباما نے 'فاردرز ڈے'کے موقعے پر سیاہ فام امریکی مردوں زور دیا ہے کہ وہ اپنے بچوں کی تربیت  زیادہ دل جمعی سے کریں۔ اوباما نے اس موقعے پر اپنے بچپن کا ذکر کیا جو ان کے والد کے بغیر گزرا تھا۔

 اوباما نے فادرز ڈے کی تعطیل اپنے آبائی شہر شکاگو کے ایک چرچ میں منائی جہاں حاضرین کی اکثریت کا تعلق سیاہ فام برادری سے تھا۔

 انھوں نے کہا کہ نصف سے زیادہ سیاہ فام بچے دونوں والدین کے بغیر زندگی گزار رہے ہیں۔ الی نوئے سے تعلق رکھنے والے سینیٹر اوباما ایک ایسی قانون سازی کی کوشش کر رہے جس کے تحت صرف  ماں یا صرف باپ پر مشتمل خاندانوں کو زیادہ مالی امداد دی جا سکے گی۔ 2006ء کی  مردم شماری کے اعداد و شمار کے مطابق امریکہ میں تقریباً ایک کروڑ 30 لاکھ ایسے خاندان ہیں جن میں بچوں کی پرورش صرف ماں یا صرف باپ کر رہے ہیں۔