شکاگو کی آسمان خراش عمارتیں

2016 کے اولمپک مقابلوں  کی میزبانی کے لئے جن چار شہروں کو منتخب کیا گیا ہے ان میں امریکی شہر شکاگو بھی شامل ہے۔ حال ہی میں ایتھنز میں عالمی اولمپک کمپنی کے اجلاس میں یہ انتخاب کیا گیا ہے۔

 آج کل اس شہر کو بنایا سنوارا جا رہا ہے تاکہ اگلے  سال کے آخر میں جب کسی ایک شہر کے انتخاب کا مرحلہ آئے تو قرعہ شکاگو کے نام ہی نکلے۔

کئی سال اس سے پہلے بھی شکاگو کا نام اولمپک  کی میزبانی کے لیے زیر غور آنے والے شہروں میں شامل کیا گیا تھا مگر شکاگو وہ انتخاب نہیں جیت سکا تھا۔ اس بار شکاگو کے شہریوں کو امیدہے کہ 2016 میں اولمپک کی مشعل اس اہم ترین امریکی شہر میں روشن کی جائے گی اور اسے دنیا بھر کے کھلاڑیوں کی میزبانی کا شرف حاصل ہوجائے گا۔

شکاگو کے شہریوں اور شہری انتظامیہ میں اولمپکس کی میزبانی حاصل کرنے کے حوالے سے بڑا جوش و خروش پایا جاتا ہے اور اس کے لیے ابھی سے تیاریاں شروع کردی گئی ہیں۔ ان مقامات کا بھی انتخاب کیا جارہا ہے جہاں پر اولمپک بستی تعمیر کی جائے گی اور اس بستی کے لیے فراہم کی جانے والی سہولتوں پر بھی سوچ بچار شروع کردی گئی ہے۔ شہر کو سرسز و شاداب بنانے کے لیے نئے پودے لگائے جارہے ہیں اور شجر کاری کی جارہی ہے۔ ماحولیات کے ماہرین کا کہنا ہے کہ 2016 میں جب اولمپکس کا میدان جمے گا تو یہ شہر دنیا بھر سے آئے اپنے مہمانوں کا آلودگی سے پاک  پر فضاء ماحول میں خیرمقدم کرے گا۔