بھارت کے سابق صدر عبدالکلام ( فائل فوٹو)

علی گڑھ مسلم یونیورسٹی کا تاریخی کینیڈی ہال اس وقت پرجوش تالیوں سے گونج اٹھا جب بھارت کے سابق صدر عبدالکلام اور سافٹ ویر صنعت کی نمایاں شخصیت عظیم پریم جی کو اعزازی سند ڈاکٹر آف سائنس سے نوازا گیا۔ انہیں یہ اسناد یونیورسٹی کے چانسلرجسٹس کے ایم احمدی نے دیں، جب کہ جلسے کی صدارت وائس چانسلر عبدالعزیز نے کی۔

 اس موقع پر پیش کردہ صفات نامے میں کہا گیا کہ دونوں شخصیات ایسی بلند ہیں جو کسی بھی اعزاز و انعام سے ماورا ہیں اور ان کی شخصیت آج کے طلبا کے لیے نور کا مینار ہے۔

 اس موقع پر سائنسدان عبدالکلام نے کہا کہ وہ سرسید احمد خان کی شخصیت سے متاثر ہیں کیونکہ وہ اپنے عہد کے عظیم دانش ور تھے جو مستقبل پر نظر رکھتے تھے۔ انہوں نے ایسی درس گاہ کا سنگ بنیاد رکھا جو صدیوں تک علم کی روشنی بکھیرتی رہے گی۔

 عظیم پریم جی نے کہا کہ وہ مسلم یونیورسٹی سے اعزاز پا کر بے حد مسرت محسوس کر رہے ہیں۔ اس موقع پر نمایاں کامیابی حاصل کرنے والے طلبا کو بھی مختلف اسناد سے نوازا گیا۔ اس یونیورسٹی میں کانوکیشن کا آغاز 1922ء سے ہوا تھا اور پاکستان کے پہلے وزیراعظم لیاقت علی خان نے بھی یہیں سے تعلیم حاصل کی تھی۔