زمبابوے کے صدر رابرٹ موگابے

برطانیہ اور آسٹریلیا کے عہدے داروں نے زمبابوے اس تشدد کی مذمت کی ہے جسے انہوں نے سرکاری سرپرستی میں ہونے والا تشدد قرار دیا ہے اور جس کی وجہ سے حزبِ اختلاف کے راہنما مارگن چنگیرائی کو اس جمعے کو ہونے والے صدراتی انتخاب کے دوسرے مرحلے سے الگ ہونے پر مجبور ہونا پڑا۔

برطانیہ کے افریقی امور کے وزیر مارک میلوچ براؤن نے پیر کے روز بین الاقوامی برادری پر زور دیا کہ وہ صدر رابرٹ موگابے کی حکومت کے خلاف نئے سخت اقدامات پر متفق ہوجائے اور انہوں نے یہ نشان دہی کی کہ خطے میں کئی اہم شخصیتوں کے پاس دنیا بھر میں بینک اکاؤنٹ موجود ہیں جنہیں منجمد کیا جاسکتا ہے۔

آسٹریلوی وزیر اعظم کیون روڈ نے پیر کے روز اپنے ملک کی پارلیمنٹ کو بتایا کہ حکومت زمبابوے کے خلاف پابندیاں بڑھانےپر غور کررہی ہے اور انہوں نے افریقی ملکوں سے اپیل کی کہ وہ موگابے حکومت کی کارروائیوں کے خلاف مزید اقدامات کرے ۔