انسانی حقوق کے ممتاز ادارے ایمنسٹی انٹرنیشنل نے یورپی حکومتوں کومشتبہ دہشت گردوں کی امریکی قیادت کے تحت خفیہ منتقلی اور حراست میں ملوث ہونے کی بنا پر نکتہ چینی کا نشانہ بنایا ہے۔

ایمنسٹی انٹرنیشنل نے ایک رپورٹ میں کہا ہے کہ جس  یورپی ملک نے بھی جانتے بوجھتے ہوئے امریکی سی آئی اے کے منتقلی کے پروگرام میں شرکت کی ہے اس نے بین الاقوامی قانون کی خلاف ورزی کی ہے۔

رپورٹ میں یورپی ملکوں کے ملوث ہونے کی  جو تفصیلات فراہم کی گئی ہیں ان  میں خفیہ حراستی مراکز یا 'بلیک سائٹس'کی میزبانی اور زیرِ حراست اشخاص کی منتقلی کے لیے سی آئی اے کی پروازوں کو یورپی ہوائی اڈوں اور فضائی راستوں کے استعمال کی اجازت  دینا شامل ہیں۔

انسانی حقوق کے ادارے نے یورپی ملکوں پر زوردیا ہے کہ وہ منتقلی کے چھ اقدامات پر عمل کریں جن میں منتقلی کا شفاف عمل، غیرجانب دارانہ تفتیش اور انٹیلی جنس اداروں کی سرگرمیوں سے پہلو تہی کی مذمت شامل ہے۔

ایمنسٹی ان ملکوں سے یہ بھی چاہتی ہے کہ وہ مزید کسی منتقلی میں مدد سے انکار کریں اور اس منتقلی کے ذمے دار افراد کو انصاف کے کٹہرے میں لائیں اور متاثرین کو تلافی فراہم کریں۔