جمعے کے روز بحرِہند میں زلزے کے جھٹکے محسوس کیے گئے جس کی شدت ریکٹراسکیل پر چھ اعشاریہ سات تھی۔ تاہم عہدے داروں کا کہنا ہے کہ اس زلزلے سے کسی تباہ کن سمندری طوفان یا سونامی کا خطرہ نہیں ہے۔

امریکی ارضیاتی سروے یوایس جی ایس کی اطلاع کے مطابق زلزلے کا مرکز بھارتی علاقے جزائر انڈومان کے دارلحکومت پورٹ بلائیر کے جنوب مغرب میں 114 کلومیٹر کے فاصلے پر تھا۔

پورٹ بلائیر کے عہدے داروں نے کہا ہے کہ زلزلے کے جھٹکوں سے جزائر کے لوگوں میں خوف و ہراس پھیل گیا مگر کسی مالی نقصان یا کسی کے زخمی ہونے کی کوئی اطلاع نہیں ملی۔

یوایس جی ایس نے کہا ہے کہ اگرچہ زلزلے سے کسی بڑے سمندری طوفان کا کوئی خطرہ نہیں ہے مگر مقامی طورپر چھوٹا سمندری طوفان آسکتا ہے جس سے زلزلے کے مرکز سے ایک سو کلومیٹر تک کے فاصلے پر واقع ساحلی علاقے متاثر ہوسکتے ہیں۔