ایشیا کپ کرکٹ ٹورنامنٹ میں فتح کے لیے بھارت کی ٹیم فیورٹ ہے اور پاکستان کووکٹری سٹینڈ پر آنے کے لیے میدان کے اندر اورباہردونوں جگہ حکمت عملی بہتربنانے کی ضرورت ہے۔

ان خیالات کا اظہار پاکستان کے سابق ٹیسٹ کرکٹر اوراوپننگ بلے بار محسن خان نے وائس آف امریکہ کے پروگرام ،، آج شام،، میں گفتگو کرتے ہوئے کیا۔

 محسن حسن خان کا کہنا تھا کہ بھارتی ٹیم کا کمبی نیشن بہت اچھا ہے ۔ بلے باز فارم میں ہیں اورپیس اٹیک بھی آسٹریلیا کے بعداس وقت دوسرے نمبر پر ہے۔

 پاکستان کی بھارت کے ہاتھوں پول میچ میں شکست کے بارے میں محسن خان کا کہنا تھا کہ پاکستانی کھلاڑی یا تو اس میچ میں حد سے زیادہ پراعتماد تھے یاان کے حوصلے بہت شکستہ تھے۔

انہوں نے کہا کہ شعیب اختر اور محمد آصف کی عدم دستیابی اور عمر گل کے ان فٹ ہونے کے سبب پاکستان کے لیے ایشیئن چیمپین بننا مشکل ہے لیکن ناممکن نہیں۔ پاکستان یہ ٹورنامنٹ جیت سکتا ہے اگر ٹیم میں آل راونڈرز کی تعداد کم کر کے مستند باولر شامل کیا جائے، بلے باز ذمے داری سے کھیلیں اورفیلڈنگ پر توجہ دی جائے۔

 شعیب ملک کے بطور اوپنر کھیلنے پر محسن خان نے کہا کہ پاکستانی وکٹوں پر تو یہ تجربہ کامیاب رہا ہے لیکن پرائی سرزمیں پر پھر ردوبدل کرنا پڑے اس لیے بہتر تھا کہ ،،میک شفٹ،، بندوبست کے بجائے ناصر جمشید کو موقع دیا جاتا۔

 باولنگ کے شعبے میں انہوں نے پندرہ رکنی پاکستانی ٹیم میں شامل سپن باولر سعید اجمل اور ڈومیسٹک کرکٹ میں پرفارم کرنے والے عبدالروف سے اچھی پرفارمنس کی تو قعات کا اظہار کیا۔