امریکہ اعلیٰ تعلیم کے لیے سٹوڈنٹ ویزا کی  بڑھتی ہوئی مانگ کو دیکھتے ہوئے امریکہ نے بھارتی طلبا کے لیے ویزا کے اجرا کی پالیسی میں نرمی کا اعلان کیا ہے۔

 چنائی میں امریکی کاؤنسلر ڈیوڈ ٹی ہوپر نے اخباری نمائندوں کو بتایا کہ سٹوڈنٹ ویزا کے حصول کے طریقہٴ کار میں نرمی پیدا کی گئی ہے  اور طلبا کو ترجیحی بنیادوں پر جلد ویزا دینے کا فیصلہ کیا گیا ہے۔

 طلبا کو اب امریکی ویزا کے لیے زیادہ انتظار کرنے کی ضرورت نہیں پڑے گی، بشرطیکہ وہ تمام درکار دستاویزات پیش کریں۔ اگر دستاویزات درست پائی گئیں، تو ایک گھنٹے سے لے کر ڈیڑھ گھنٹے کے اندر اندر ویزا جاری کیا جا سکتا ہے۔

ڈیوڈ ہوپر نے بتایا کہ جنوبی بھارت سے ہر سال تین لاکھ ویزا درخواستیں وصول ہو رہی ہیں، جن میں ایک تہائی سے زیادہ درخواستیں آندرا پردیش سے ہوتی ہیں، لہٰذا جاری سال کے اختتام تک حیدرآباد میں مکمل ویزا آفس قائم کرنے کا فیصلہ کیا گیا ہے۔