جیف لاسن میڈیا سے گفتگو کرتے ہوئے ( فائل فوٹو)

اتوار کو سری لنکا سے ہارنے کے بعد، پاکستانی ٹیم کے کپتان شعیب ملک نے پریس کانفرنس سے خطاب نہیں کیا۔ اُن کی جگہ ٹیم کے آسٹریلوی کوچ جیف لاسن میڈیا کانفرنس کے لیے آئے لیکن اُن کا اصرار تھا کہ وہ تند و تیز سوالات کے جواب نہیں دیں گے۔

جیف لاسن نے صحافیوں کو مخاطب کرکے کہا کہ صحافی بیان دینے کی بجائے سوالات کریں۔ سوال معقول ہونےچاہیئں ورنہ جیف لاسن اُن کے جواب نہیں دیں گے۔ جب ایک صحافی نے ان سے سوال کیا تو انھوں نے بیچ میں ٹوک کر ان کی انگریزی درست کرنے کی کوشش بھی کی۔

اِس پر صحافیوں نے احتجاج کیا جِس پر جیف لاسن اٹھ کر پریس کانفرنس سے چلے گئے لیکن پھر کچھ سوچ کر واپس بیٹھ  گئے۔ لیکن اِس بار صحافیوں نے احتجاجاً جیف لاسن کی پریس کانفرنس کا بائیکاٹ کر دیا۔

نویں ایشیا کپ کرکٹ ٹورنامنٹ میں پیر کے دن سری لنکا کا بنگلہ دیش سے مقابلہ ہوا جس میں سری لنکا نے بنگلہ دیش کو 158 رنز سے ہرا کا ٹورنامنٹ کے فائنل تک رسائی حاصل کر لی۔ جائے سوریا نے آج اپنی 39 ویں سال گرہ کے موقعے پر جارحانہ اننگز کھیلتے ہوئے 130 رنز بنائے جس میں 16 چوکے اور 6 چھکے شامل تھے۔ ان کے علاوہ سنگاکارا نے بھی 121 رنز کی شان دار اننگز کھیلی۔

سری لنکا کے 332 رنز کے پہاڑ کے جواب میں بنگلہ دیش کی ٹیم صرف 174 رنز بنا پائی۔ سری لنکا کے ایک اور سینئر کھلاڑی مرلی دھرن نے عمدہ کارکردگی کا مظاہرہ کرتے ہوئے 31 رنز دے کر پانچ کھلاڑیوں کو پویلین کی راہ دکھائی۔

یہ میچ جیت کرسری لنکا کی ٹیم کی فائنل میں شرکت یقینی ہو گئی ہے۔ 

ادھر پاکستانی ٹیم کے مینیجر طلعت علی نے کہا ہے کہ پاکستان اپنے بقیہ دونوں میچ جیتنے کی بھرپور کوشش کرے گا۔ کل پاکستان کا مقابلہ بھارت سے ہو گا۔