جمعے کا دن ہمیشہ سے فلم انڈسٹری کے لیے اہم رہا ہے ۔ بالی وڈ کے دو نئے ہیرو عمران خان اور ہرمن باویجہ کے لیے کل آنے والا جمعہ اُن کی زندگی کا سب سے خاص دن ہوگا۔چار جولائی کے روز’جانے تو یا جانے نا‘ اور ’لواسٹوری2050ء‘ دو نئی فلمیں پورے بھارت میں ریلیز ہو رہی ہیں۔ باکس آفس پر یہ دونوں فلمیں کتنی دھوم مچائیں گی اِس کے لیے ایک دن کا اور انتظار کرنا ہوگا ۔ تاہم اپنی پہلی فلم کی تشہیر کے لیے عمران اور ہرمن دونوں کی ٹیموں نے ایڑی چوٹی کا زور لگا دیا ہے۔ عمران خان سپر سٹار عامر خان کے بھانجے ہیں۔ واضح رہےکہ فلم ’جانے تو یا جانے نا‘ عامر خان پروڈکشن کے بینر کی پیش کش ہے۔ اسی لیے فلم کی پبلسٹی کے دوران عامر اپنے بھانجے عمران کے ساتھ ہر جگہ نظر آئے ۔ دلچسپ بات یہ ہے کی فلم ’جانے تو یا جانے نا‘ کو منصور علی خان نے پروڈیوس کیا ہے۔ یہ وہی منصور ہیں جنھوں نے 80 کی دہائی میں عامر خان کی پہلی فلم’قیامت سے قیامت‘ تک بنائی تھی، جس نے بالی وڈ فلموں کا رخ بدل کر رکھ دیا تھا۔ نامور موسیقار اے آر رحمان نے فلم ’جانے تو یا جانے نا‘ کے لیے موسیقی دی ہے ۔ فلم کے ’ادیتی‘ اور’پپو کانٹ ڈانس‘ یہ دونوں گانے کافی ہٹ ہو چکے ہیں ۔ فلم کا اسکرپٹ عباس ٹائر والا نے لکھی ہے جو اِس فلم کے ہدایت کار بھی ہے۔
اگر عمران کے لیے ہر قدم پر عامر موجود ہیں تو ہرمن باویجہ نے بالی وڈ کی کامیاب اد اکارہ پرینکا چوپڑا کا ہاتھ اپنی پہلی فلم کی تشہیر کے لیے تھاما۔ ہرمن فلمساز ہیری باویجہ کے بیٹے ہیں۔ ہیری اپنے بیٹے کو بالی وڈ کی مہنگی ترین فلم ’لواسٹوری 2050‘ کے ذریعے فلموں میں لانچ کر رہے ہیں ۔ ہرمن کے علاوہ اس فلم میں پرینکا چوپڑا ہیں جو کی اصل زندگی میں ہرمن کی معشوقہ بھی ہیں۔ اور اسی لیے فلم کی مارکیٹنگ ار پروموشن کے دوران پرینکا ہر موقعے پر ہرمن کے ساتھ رہ کر اُن کی حوصلہ افزائی کرتی نظر آئیں۔ ایک طرف فلم ’جانے تو یا جانے نا‘ کی کہانی ایک متوسط خاند ان کے لڑکے کی محبت کی داستان کے ساتھ دوستی کے رشتے کے معنی ڈھونڈنے کی کوشش پر مبنی ہے وہیں دوسری طرف’لواسٹوری 2050 ء‘کی کہانی سائنس فکشن پر مبنی ہے۔ اسی لیے ہرمن کی فلم میں لڑکی نما روبوٹ ’کیو ٹی ‘ بھی اہم کردار میں نظر آئے گی ۔واضح رہے کہ ’لواسٹوری 2050کا پریمئیر 2 جولائی کو لندن میں منعقد کیا گیا تھا ۔
![[insert caption here]](/urdu/images/Jaane-tu.jpg "[insert caption here]")
![[insert caption here]](/urdu/images/Lovestory2050.jpg "[insert caption here]")
اس صفحے کو ای میل کیجیے
قابل چھپائی صفحہ
