رہائی کے بعد فرانسیسی سیاست دان انگرڈ بیٹن کورٹ اپنے بچوں کے ساتھ

عالمی برادری نے کولمبیا کے جنگل سے فرانسیسی کولمبین سیاست دان انگرڈ بیٹن کورٹ، تین امریکی دفاعی ٹھیکے داروں اور گیارہ دوسرے مغویوں کی رہائی کا خیر مقدم کیا ہے۔چھ سال تک قید رہنے کے بعد انگرڈ بیٹن کورٹ فرانس پہنچ گئی ہیں۔

انھیں اور 14 دوسرے یرغمالوں کو بدھ کے دن ایک دلیرانہ امدادی کارروائی میں اغواکاروں کی حراست سے چھڑوا لیا گیا تھا۔ کولمبیا کے سیکیورٹی اہل کاروں نے اس کارروائی کو بے عیب قرار دیا۔

حکام کا کہنا ہے کہ کولمبیا کے خفیہ اداروں کے اہل کاروں نے کولمبیا کی انقلابی پارٹی FARC کو دھوکے سے پیش کش کی کہ وہ ان کے اہم یرغمالوں کو ہیلی کاپٹر کے ذریعے ایک اور مقام تک منتقل کرنا چاہتے ہیں۔

جب یرغمالی ہیلی کاپٹر پر سوار ہوئے تو انھیں معلوم ہوا کہ وہ سرکاری ہیلی کاپٹر تھا جو انھیں اڑا کر محفوظ مقام تک لے گیا۔  حکام کا کہنا ہے کہ اس دوران ایک گولی بھی نہیں چلائی گئی۔

تین امریکی یرغمالی آج صبح ٹیکسس میں امریکی فضائیہ کے ہوائی اڈے پر پہنچے جہاں سے انھیں ان کے گھروں تک لے جایا جائے گا۔