ہالینڈ کے وان در ہورسٹ پاکستان کے محمد جاوید سے گیند چھین رہے ہیں

چین کے شہر بیجنگ میں جاری29 اولمپک کھیلوں کے ہاکی مقابلے میں ہالینڈ نے پاکستان کو چار کے مقابلے پر دو گول سے ہرا دیا۔ اس طرح ہالینڈ کی ٹیم پانچ میچوں میں 13 پوائنٹس حاصل کر کے سیمی فائنل تک پہنچنے والی پہلی ٹیم بن گئی ہے، جب کہ پاکستان کی ٹیم سیمی فائنل کی دوڑ سے باہر ہو گئی ہے۔ اس کے ساتھ ہی اولمپکس میں پاکستانی دستے کا کوئی تمغہ حاصل کرنے کا خواب  بھی چکنا چور ہو گیا ہے۔

منگل کے روز کھیلے جانے والے آخری لیگ میچ میں اگرچہ پاکستان کی ٹیم نے ہالینڈ جیسی مضبوط ٹیم کے خلاف اچھے کھیل کا مظاہرہ کیااور پہلے گول کر کے برتری بھی حاصل کر لی تھی لیکن اس کے بعد ہالینڈ نے جارحانہ کھیل پیش کرتے ہوئے یکے بعد دیگرے گول کیے۔

اب پاکستان کی ٹیم پانچویں سے آٹھویں پوزیشن کے لیے مقابلہ کرے گی۔ اس کے ساتھ ہی ساتھ پاکستان کو اگلے برس ہونے والی چیمپئنز ٹرافی ٹورنمنٹ کے لیے بھی کوالی فائنگ میچ کھیلنا پڑیں گے۔

بیجنگ میں پاکستانی ٹیم کی ناقص کارکردگی کے بارے میں پاکستان ہاکی کی تاریخ کی کامیاب ترین شخصیت بریگیڈیر منظور حسین عاطف نے وائس آف امریکہ کو خصوصی تبصرے میں بتایا:

’جس طرح سے ٹیم کھیلی اور ہاری ہے، مجھے اس کا ذاتی طور پر بڑا دکھ ہوا ہے۔ مجھے مستقبل میں بھی کسی بہتری کے آثار نظر نہیں آ رہے۔ پہلے ہمارے پاس بینکوں اور دوسرے اداروں کی آٹھ دس مضبوط ٹیمیں ہوتی تھیں جوآپس میں کھیلتی تھیں۔اب کوئی محکمہ ٹیم ہی نہیں بناتا۔ اس سے کھلاڑی بھی پریشان ہیں۔‘