بہار میں سیلاب سے پھیلنے والی تباہی

بھارت کے صوبے بہار کے 16 اضلاع  سیلاب  کی زدمیں ہیں، جب کہ  متاثرہ لوگ امداد کے منتظر ہیں۔

بھارت کے وزیرِ اعظم ڈاکٹر من موہن سنگھ نے جمعرات کے روزبہار کے چار اضلاع کا فضائی معائنہ  کیا۔ کانگریس پارٹی کی چیرپرسن سونیا گاندھی بھی اُن کے ہمراہ تھیں۔

ابتدائی سروے کے بعد من موہن سنگھ نے اخباری نمائندوں کا بتایا کہ یہ  قدرتی آفت ہے، جِس کا مل کر مقابلہ کرنا ہوگا۔ اُنہوں نے ایک ارب روپے اور سوا لاکھ میٹرک ٹن اناج فوری طور پر دینے کا بھی اعلان کیا۔

خبروں میں بتایا گیا ہے کہ بہار کے 16 ضلعے ایسے ہیں جہاں قیامت خیز تباہی آئی ہے۔کھانے پینے کی اشیا کے علاوہ  متاثرہ لوگوں کو پینے کا صاف پانی بھی میسر نہیں ہے اور بیماریاں پھیلنے کا خطرہ لاحق ہے۔

 امدادی کاموں کے لیے فوج کو تعینات کیا گیا ہے، اور کوششیں کی جارہی ہیں کہ متاثرہ  لوگوں کو کشتیوں کے ذریعے محفوظ مقامات  کی طرف منتقل کیا جائے۔