آصف زرداری اپنی دونوں بیٹیوں کے ہمراہ ایوانِ وزیر اعظم میں حاضرین سے خطاب کر رہے ہیں

صدارتی انتخاب میں کامیابی حاصل کرنے کے بعد وزیرِ اعظم ہاؤس اسلام آباد میں افطار ڈنر سے اپنے مختصر خطاب میں نو منتخب صدرِ پاکستان آصف علی زرداری نے کہا کہ وہ جمہوریت کے مشن کو آگے بڑھائیں گے۔

اپنی مختصر تقریر میں نو منتخب  صدرِ پاکستان نے کہا کہ پارلیمان کی بالادستی قائم کرنے کے لیے اپنے عزم کا اعادہ کیا۔

اُنہوں نے کہا کہ پارلیمنٹ خود مختار ہے اور بحیثیتِ صدر وہ پارلیمان کے تابع رہیں گے۔

نو منتخب صدر نے کہا کہ ایک کمزور جمہوریت نے دو تہائی اکثریت سے صدر کو منتخب کرکے وہ کام کر دکھایا جو ایک فوجی آمر نہ کر سکا،اور یہی جمہوریت کا پیغام ہوتا ہے۔

اپنے ناقدین کے اِن الزامات کا جواب دیتے ہوئے کہ وہ ایک متنازعہ صدر ہوں گے، اُنہوں نے کہا:’99فی صد لوگوں نے صدر کو منتخب کیا ہے اور اُن پر تنقید کرنے والے جمہوریت کے اِس پیغام کو سمجھیں۔‘

 اِس سے قبل انتخاب میں کامیابی حاصل کرنے کے بعد اپنے ایک تحریری بیان میں آصف علی زرداری نے کہا کہ پاکستان کو ایک مشکل وقت درپیش ہے اور ایسے میں اُن کے کندھوں پر ذمہ داریاں بڑھ گئی ہیں۔

اُنہوں نے کہا کہ جمہوری حکومت اور پارلیمان کی حمایت اُن کی اولین ترجیح ہوگی اور آئین میں ترامیم کرکے ایوانِ صدر اور پارلیمان کے درمیان توازن قائم کیا جائے گا۔