ملائیشیا کے نائب وزیر اعظم نجیب رزاق

ملائیشیا کے ایک مقبول بلاگر پر نائب وزیر اعظم کو مبینہ طورپر منگولیا کی ایک عورت کے قتل میں ملوث ظاہر کرنے کی بنا پر فتنہ پروری  کےالزامات کی بنا پر مقدمہ چل رہا ہے ۔

راجا پترا کمارالدین نے کسی بھی غلط کام کے کرنے سے انکار کیا ہے۔ وہ پیر کے روز کولالمپور میں اپنے مقدمے پہلے دن عدالت میں پیش ہوئے۔

فتنہ پروری کے یہ الزامات راجا پترا کے  اس مضمون کی وجہ سے پیدا ہوئے  جو اپریل میں ان کی حکومت مخالف نیوز ویب سائٹ ملائیشیا ٹوڈے میں شائع ہوا تھا۔

اس مضمون میں مبینہ طور پر نائب وزیر اعظم نجیب رزاق اور ان کی اہلیہ رسما منظور کو 2006ء میں منگولیا کی ایک 26 سالہ عورت التن طویہ شاری بو کی ہلاکت سے منسلک کیا گیا تھا۔

نجیب اس جرم میں ملوث ہونے سے انکار کرتے ہیں ۔ ان کے قریبی ساتھی پر قتل میں مدد کرنے کا الزام ہے اور دوپولیس اہل کاروں پر عورت کے قتل کا الزام ہے۔

راجا پترا اندونی سلامتی کے ایکٹ کے تحت جو انسداد دہشت گردی کا وہ قانون ہے جو بغیر کوئی مقدمہ چلائے حراست کی اجازت دیتا ہے، ایک الگ مقدمے میں پہلے ہی جیل میں ہیں۔