صوبہ پنجاب کے جنوبی ضلع بھکر میں رکن قومی اسمبلی رشید اکبر نوانی کے ڈیرے پر ہونے والے خود کش حملے کے بعد واقعات کی تحقیقات جاری ہیں اور ملک میں سیکورٹی بڑھا دی گئی ہے۔ پولیس کے مطابق یہ دہشت گردی کا واقعہ تھا اور ماہرین نے ڈی این اے ٹیسٹ کے لیے خود کش حملہ آور کے جسم کے ٹکڑے اکٹھے کر لیے ہیں۔

ڈسٹرکٹ ہیڈکوارٹر ہسپتال بھکر کے میڈیکل سپر نٹنڈنٹ احسان الحق نے وآئس آف امریکہ کو بتایا کہ حملے میں ہلاک ہونے والوں کی تعداد 17 ہو گئی ہے جب کہ65 افراد زخمی ہیں۔ زخمیوں میں اپوزیشن جماعت مسلم لیگ نوا ز سے تعلق رکھنے والے رشید نوانی بھی شامل ہیں جنھیں شیخ زید ہسپتال لاہور منتقل کر دیا گیا ہے۔منگل کے روز گورنر پنجاب سلمان تاثیر نے ان کی عیادت کے بعد صحافیوں سے بات چیت کرتے ہوئے کہا کہ خود کش حملے میں ملوث عناصر اسلام اور ملک کے دشمن ہیں۔

واضح رہے کہ پیر کی شام جب رشید نوانی اپنے ڈیر ے پر لوگوں سے عید مل رہے تھے تو اس دوران ایک خود کش حملہ آور داخل ہو ا اور اس نے اپنے آپ کو دھماکے سے اڑا لیا۔ عینی شاہدین کے مطابق دھما کہ اس قدر شدید تھا کہ لوگو ں کے اعضاء دور دور تک بکھر گئے اور اس کے علاوہ قریبی عمارتوں کو بھی نقصان پہنچا۔ حملے میں ہلاک ہونے والوں کی تدفین کی تیاریاں کی جار ہی ہیں۔

صدر آصف علی زرداری اور وزیر اعظم یوسف رضا گیلانی نے اس خود کش حملے کی مذمت کرتے ہوئے عزم ظاہر کیا ہے کہ اس طرح کے واقعات دہشت گردی کے خلاف جنگ کو کمزور نہیں کر سکتے۔