جنوبی پنجا ب کے ضلع لودھراں کے قریب مسافر بس ٹرالر سے ٹکرا گئی جس کے نتیجے میں بس میں سوارطلبا اور خواتین سمیت کم از کم 20افراد ہلاک ہوگئے ہیں جبکہ متعدد افراد زخمی ہیں جن میں اکثر کی حالت تشویشناک بتائی جاتی ہے۔

لودھراں کے ضلعی پولیس افسر سید خرم علی نے وائس آف امریکہ کو بتایا کہ یہ حادثہ دنیا پور خانیوال روڈ پرجمعے کی صبح ساڑھے نو بجے کے قریب پیش آیا۔ اُنہوں نے کہا کہ 20 سے زائد لاشوں کو جاعہ وقوع سے لودھراں ہسپتال منتقل کر دیا گیا ہے۔ضلعی پولیس افسر کے مطابق صبح کے وقت جب یہ حادثہ پیش آیا اُس وقت سکول اور کالج کے طلبہ بس میں سفر کر رہے تھے تاہم ہلاک ہونے والوں میں طلبا کے علاوہ خواتین اور بزرگ شامل ہیں۔

سید خرم علی نے کہا کہ اس حادثے میں شدید زخمی ہونے والے15 افراد کو قریبی ضلع بہاولپور کے وکٹوریہ ہسپتال میں منتقل کر دیا گیا ہے۔

یاد رہے کہ 29ستمبر کو جنوبی پنجاب کے ہی ایک ضلع مظفر گڑھ کے قریب مسافر بس اور ٹینکر میں تصادم کے باعث کم از کم 37افراد ہلاک ہوگئے تھے۔