جنوبی کوریا نے کہاہے کہ امریکہ اور شمالی کوریا  تعطل کے شکار اس معاہدے کو بچانے کے قریب ہیں جس کا تعلق شمالی کوریا کے جوہری ہتھیاروں کے پروگرام کے خاتمے سے ہے۔

خبروں میں بتایا گیا ہے کہ امریکہ اور جاپان نے جمعرات کے دن کہا تھا کہ بش انتظامیہ شمالی کوریا  کی جانب سے اپنی جوہری سرگرمیوں کی تصدیق کا طریقہ کار بھیجنے پر رضامندی کے بدلے میں مشروط طورپر اسےدہشت گردی کی فہرست سے خارج کرنے پر تیار ہوسکتی ہے۔

جنوبی کوریا کے وزیر خارجہ یو میونگ ہوان نے  جمعے کے روز سیؤل میں نامہ نگاروں کو بتایا کہ اس سمجھوتے کا اعلان مستقبل قریب میں کیا جاسکتا ہے۔ یو نے کہا کہ معاہدہ شمالی کوریا کے پلوٹونیم سے منسلک سرگرمیوں  پر مرکوز ہوگا۔

جاپان کی کیوڈو نیوز ایجنسی نے کہا ہے کہ  امریکہ جمعرات کے روز تصدیق کے ایک ایسے منصوبے کو قبول کرنے پر متفق ہوگیا ہے جس میں یورینیم کی افزودگی کے مشتبہ پروگرام یا ایٹمی پھیلاؤ سے متعلق سرگرمیوں کی تفصیل شامل نہ ہو۔