سنیٹر ہلری کلنٹن پینسلوینیا کی پرائمری جیتنے کے بعد

پینسلوینیا کی پرائمری جیتنے سے سنیٹر ہلری کلنٹن کو وہ اعتماد مل گیا ہے جو انہیں صدارتی نامزدگی کی دوڑ میں شامل رہنے کے لیے درکار تھا۔ ہلری کلنٹن نے اپنے مخالف براک اوباما کو تقریباً 10 % کی برتری سے شکست دی۔ اس فتح کے بعد ہلری کو اب یہ توقع ہے کہ وہ ان فتوحات کا سلسلہ جاری رکھ کر سپر ڈیلی گیٹس کو اپنے حق میں فیصلہ دینے پر مائل کرسکتی ہیں۔

ہلری کلنٹن کو صدارتی دوڑ میں موجودگی کے لیے اس فتح کی اشد ضرورت تھی۔ منگل کے روز ڈیموکریٹک پارٹی کے ووٹرز نے ہلری کلنٹن کو وائٹ ہاؤس کی طرف جانے والی سڑک پر ایک اور گرین سگنل دیا۔ اور ان کو اس ریس کے اگلے مرحلے تک پہنچا دیا۔

تجزیہ کار اسے ہلری کلنٹن کے لیے ایک بڑی فتح قرار دے رہے ہیں کیونکہ وہ ریاست کے تمام علاقوں سے جیتی ہیں۔ انہیں یہ کامیابی دلانے میں زیادہ تر عورتیں اور بڑی عمر کے لوگ شامل ہیں۔اگرچہ 10% برتری نے ہلری کلنٹن کی پوزیشن مضبوط بنادی ہے لیکن اس کے باوجود اب تک کی گنتی کچھ اور بتاتی ہے۔

ڈیلی گیٹس کی بات کی جائے تو براک اوباما کو ہلری کلنٹن پر 150 ڈیلی گیٹس کی برتری حاصل ہے اور پاپولر ووٹوں میں اوباما کو ان سے5 لاکھ زیادہ ووٹرز کی حمایت حاصل ہے۔ اس گنتی میں فلوریڈا اور مشی گن کے ووٹ شامل نہیں ہیں۔

ایک سروے کے مطابق 27% سفید فام ڈیموکرٹک ووٹرز کا کہنا ہے کہ اگر براک اوباما نامزد ہوئے تو وہ نومبر میں ریپبلکن جان مکین کو ووٹ دیں گے۔

دونوں امید واروں کے درمیان جاری اس مقابلے کا اگلا میدان نارتھ کیرولائنا اور انڈیانا میں سجے گا جہاں اوباما نے ابھی سے اپنی مہم کا آغاز کر دیا ہے۔