چندہ اکٹھا کرنے کے لیئے کھانے کی ایک دعوت

امریکہ میں انتخاب لڑنے کے لیے امیدوار کے پاس بہت سے وسائل کا ہونا ضروری نہیں ہے کیونکہ الیکشن پر خرچ ہونے والی رقم اسے اپنی جیب سے خرچ نہیں کرنی ہوتی۔ یہ رقم ان لوگوں سے چندے کے ذریعے حاصل کی جاتی ہے جن کی وہ نمائندگی کرنے جا رہا ہوتا ہے۔ چندہ اکٹھا کرنے کی مہم کی وجہ سے اس کا عام شہریوں کے ساتھ رابطہ ہوتا ہے اور اسے ان کے مسائل اور مشکلات کا بھی پتا چلتا ہے۔ اب پاکستانی بھی امریکی انتخابات میں اپنی پسند کے کسی امیدوار کے لیے چندہ اکٹھا کرنے کی مہم چلاتے دکھائی دینے لگے ہیں۔ امریکی ریاست ورجینیا میں ایک امیدوار لزلی بائرن کے لیے ایک پاکستانی چندہ جمع کرنے کی مہم چلارہے ہیں۔

کانگریس کے امیدوار کا کہنا ہے کہ ایسا اس لیے ہے کیوں کہ یہاں بسنے والے پاکستانی سیاسی نظام میں حصہ لے رہے ہیں اور اس فنڈ ریزر کا مقصد بھی یہی ہے۔ اس کا انعقاد صدیق شیخ نے کیا ہے جوپاکستانی امریکن بزنس گروپ کے چیئرمین ہیں اور کئی عشروں سے یہاں آباد ہیں۔ وہ یہاں بسنے والی پاکستانی کمیونٹی کے لیے ایک عرصے سے کام کر رہے ہیں۔ وہ کہتے ہیں کہ سیاسی نظام کا حصہ بنے بغیر ہم اپنی آواز حکومت تک نہیں پہنچا سکتے۔

کمیونٹی کے لیے کام کرنے والے افراد کا یہ کہنا ہے یہاں بسنے والے تمام پاکستانیوں کو ووٹر کے طورپر اپنے نام کا اندراج ضرور کروانا چاہیے تاکہ وہ جب بھی سیاسی نمائندوں کے پاس جائیں تو نہ صرف یہاں بلکہ پاکستان کے حوالے سے کیے جانے والے فیصلوں میں بھی ان کی بات سنی جائے۔