براک اوباما

امریکی ڈیموکریٹک صدارتی امیدوار براک اوباما اور ہلیری کلنٹن جمعرات کووسط مغربی ریاست انڈیانا میں اپنی مہم چلا رہے ہیں جب کہ ریاست میں نامزدگی کے لیے پرائمری انتخابات قریب آرہے ہیں۔

اوباما اپنے سابق پادری ریورینڈ جرمیا رائٹ کی جانب سے نسل اور امریکی حکومت مخالف بیانات کی وجہ سے ان کی مذمت پر مجبور کیے جانے کے بعد اپنی انتخابی مہم کو دوبارہ مجتمع کرنے کی کوشش کر رہے ہیں۔

بدھ کے روز مہم کے دوران الی نوئے کے سینیٹر نے ایک ووٹرکو بتایا کہ اپنے پادری اور بیس سال پرانے دوست ریورینڈ رائٹ پر تنقید بہت مشکل کام تھا۔لیکن اوباما نے یہ بھی کہا کہ ان کی انتخابی مہم امریکی لوگوں اور ان کو درپیش چیلنجوں کے بارے میں ہے۔

ادھر ہلیری کلنٹن نے بدھ کے روز انڈیانا میں مہم کے دوران ریورینڈ رائٹ کے تنازعے پر گفتگو سے اجتناب کیا۔لیکن فاکس نیوز ٹیلی وژن نیٹ ورک پر ایک انٹر ویو میں نیو یارک کی سینیٹر نے کہا کہ انہیں بھی پادری کے خیالات جارحانہ لگے تھے۔