ایشیا پیسیفک اکنامک کارپوریشن فورم کے لیڈروں نے سڈنی، آسٹریلیا میں اپنا سر براہی اجلاس غیر یقینی عالمی تجارتی مذاکرات میں فوری پیش رفت کی ایک اپیل پر ختم کیا ۔

 21 لیڈروں نے اتوار کے روز ایک بیان جاری کیا جس میں دوہا مذاکرات کے حتمی مرحلے میں داخلے کی یقین دہانی کے لئے سیاسی رضامندی ، لچک اور عزم کا عہد کیا گیا۔

غربت میں کمی لانے سے متعلق دوہا مذاکرات، زرعی پابندیوں اور سامان تک مارکیٹ کی رسائی کے بارے میں اختلافات پر تعطل کا شکار ہیں ۔

ایک اور معاملے میں ایپیک کے لیڈرں نے کہا کہ دنیا کو گرین ہاؤس گیسوں کا اخراج، جنہیں ماحول کی تبدیلی کی ایک بڑی وجہ سمجھا جاتا ہے، بقول ان کے ، کم کیا جانا چاہیے ، روکا جانا چاہیے اور پھر بالکل ختم کر دیا جانا چاہیے۔ تاہم انہوں نے گرین ہاؤس گیس کے اخراج میں کمی کے لئے کوئی واضح ہدف متعین نہیں کیے۔

ماحولیات کے ماہرین کہتے ہیں کہ اہداف کے تعین کے بغیر سڈنی معاہدہ بے معنی ہے۔