امریکہ کے سابق نائب صدر ایل گور

امریکہ کے سابق نائب صدر ایل گور اور اقوام متحدہ کے پینل کو 2007ءکا امن کا نوبیل انعام دیا گیا ہے ۔ انہیں یہ ایوارڈ ماحولیاتی تبدیلی پر ان کے کام کی بنا پر دیا گیا۔

نوبیل امن کمیٹی نے جمعے کے روز ناروے کے شہر اوسلو میں اس انعام کا اعلان کرتے ہوئے کہا کہ جناب ایل گور اور ماحولیاتی تبدیلی پر اقوام متحدہ کے بین الحکومتی پینل کو یہ اعزاز انسانوں کی لائی ہوئی ماحولیاتی تبدیلی کے بارے میں آگہی پھیلانے اور اس کے خلاف لڑنے کے لیے بنیادیں فراہم کرنے کی کوششوں کی وجہ سے دیا گیا ہے ۔

انعام دیتے ہوئے نوبیل کمیٹی نے کہا کہ جناب ایل گور ایک عرصے سے دنیا کے ممتاز ماحولیاتی سیاست دان کا کردار ادا کر رہے ہیں۔

جناب ایل گور نے کہا کہ اس اعزاز سے ان کی زبر دست عزت افزائی ہوئی ہے اور یہ ان کے لیے اس وجہ سے اور بھی با معنی ہو جاتا ہے کہ اس کی جیت میں ان کے ساتھ اقوام متحدہ کا آئی پی سی سی بھی شامل ہے۔

جناب ایل گور نے کہا کہ ماحولیاتی تپش صرف سیاسی مسئلہ نہیں ہے بلکہ تمام انسانیت کے لیے اخلاقی چیلنج کی حیثیت رکھتا ہے۔

انھوں نے مزید نے کہا کہ وہ اس انعام سے حاصل ہونے والی رقم میں سے کچھ حصہ ایک فلاحی ادارے کو بطور عطیہ دیں گے ۔

کمیٹی نے کہا کہ آئی پی سی سی نے پہلی مرتبہ انسانی سرگرمیوں اور ماحولیاتی تپش کے درمیان تعلق کے سلسلے میں بڑی حد تک اتفاق رائے پیدا کیا ہے ۔

آئی پی سی سی 1988ء میں ماحولیاتی تبدیلی کے مسائل پر حکومتوں کی راہنمائی کے لیے قائم کی گئی تھی۔

اس سال کے شروع میں ایل گور کی ماحول پر بننے والی فلم ’ ایک تکلیف دہ سچ‘ نے بہترین دستاویزی فلم کا آسکر یوارڈ جیتا تھا۔